Главные новости Камыстинского района – Qostanai Media

Жайылма жерінде жыл басынан бері 30-дан астам экологиялық акция ұйымдастырылып, «Жасыл Ел» бағдарламасы аясында 75 жас жұмыспен қамтылды.

Қоғамдық жұмыстарға белсенді араласып, туған өлкенің тазалығы мен көркеюіне үлес қосып жүрген жастардың қатары артып келеді. Қамысты ауданында еріктілер қозғалысы жүйелі жолға қойылып, экологиялық бастамалар мен жастар жобалары тұрақты жүзеге асырылуда.

Аудан әкімі Ерлан Жаулыбаевтың айтуынша, бүгінде аудандық еріктілер штабында 80 белсенді жас бар. Ал еріктілік қызметке тартылған тұрғындардың жалпы саны 397 адамға жеткен. Олардың арасында 26 мемлекеттік қызметші де бар.

Жыл басынан бері «Таза Қазақстан» республикалық бағдарламасы аясында жастардың қатысуымен 30-дан астам экологиялық акция өткізілген. Сонымен қатар қоршаған ортаны қорғау идеясын насихаттау мақсатында мыңға жуық бейнеролик әзірленіп, аудан тұрғындары арасында таратылған.

Ауданда жастардың бос уақытын тиімді ұйымдастыруға да көңіл бөлінеді. Осы бағытта балалар мен жасөспірімдердің шығармашылық және спорттық қабілеттерін дамытуға арналған «Көше FEST» жобасы тұрақты жалғасып келеді.

Жастарды еңбекке баулу бағытында «Жасыл Ел» бағдарламасы да өз нәтижесін көрсетуде. Жыл сайын жаз мезгілінде Қамысты ауылында жастар еңбек жасағы жұмыс істейді. Биыл бағдарлама аясында 75 жас жұмыспен қамтылып, оны жүзеге асыруға 9 миллион теңге бөлінген.

Бұдан бөлек, «Таза Қазақстан» бағдарламасы аясында 1 мамыр мен 1 қыркүйек аралығында «Үздік үй – Үздік аула» аудандық байқауы ұйымдастырылады. Байқаудың жүлде қоры – 1 миллион теңге. Бастама тұрғындарды өз аулаларын таза ұстап, елді мекендердің көркеюіне үлес қосуға ынталандыруды көздейді.

Шұға ҚОҢҚАБАЙ,
Суреттер аудан әкімдігінен алынды