Қамысты ауданының 70 жылдығына арналған тарихи кітап жарық көрді

 Қамысты ауданының 70 жылдық мерейтойына орай «Біз жазған тарих / История, написанная нами» атты жаңа шежірелі кітап жарық көрді.

Бұл еңбек – аудан тарихын, елге еңбегі сіңген азаматтар мен ұжымдардың өмір жолын, тәуелсіздік жылдарындағы өңір тынысын баяндайтын маңызды жинақ.

Кітаптың құрастырушысы әрі редакциялық алқа мүшесі – этнограф-журналист Ермұрат Бекмұхамедов. Ұзақ жылдар бойы өңірдің тарихын зерттеп жүрген автордың бұл жобаны қолға алуы – кездейсоқтық емес. Оның айтуынша, бұл жұмысты бастау үлкен жауапкершілік болғанымен, жергілікті биліктің нақты қолдауы нәтижесінде ауқымды еңбек жүзеге асты.

– «Туған өлкенің тарихын жазу – дерек пен дәйекке негізделген күрделі жұмыс. Біз бұл еңбекте шынайылық пен тарихи нақтылықты басты орынға қойдық», – дейді Ермұрат Бекмұхамедов.

Кітапта аАэуданның өткен кезеңдері мен қазіргі тынысы; Бұрынғы және қазіргі әкімдердің, ардагерлердің жүрекжарды тілектері; Қамысты ауданының Құрметті азаматтары туралы мәліметтер; Ауылдардың шығу тарихы, топонимикалық деректер; Мәдениет, білім, денсаулық сақтау, кәсіпкерлік салаларындағы жетістіктер; Заманауи Қамысты өңірінің келбеті; Ақын Несса Кутерманның ауданға арналған өлеңдері қамтылған.

Жинақ нақты архивтік деректерге, атап айтқанда Қамысты, Қостанай және Ақтөбе облыстық архивтеріндегі құжаттарға сүйене отырып жазылған. Еңбек қазақ және орыс тілдерінде басылып шықты.

Алғашқы тираж – 200 дана. Қазіргі таңда қосымша 100-200 дана кітапты қайта басып шығару жоспарлануда. Кітап ауданның барлық ауылдық және мектеп кітапханаларына, мемлекеттік мекемелерге тегін таратылатын болады.

«Бұл кітап – менің ғана емес, бүкіл аудан халқының ортақ еңбегі. Болашақ ұрпақ туған жерінің тарихын танып, мақтаныш етсе – еңбегіміздің ақталғаны», – дейді автор.

Шұға ҚОҢҚАБАЙ