Главные новости Камыстинского района – Qostanai Media

Қамысты ауданының тұрғыны, үш баланың анасы Диана Нестерова мемлекеттік грантты тиімді пайдаланып, ауылда табысты кәсіп бастаған жандардың бірі.

Бүгінде ол табиғи сүт өнімдерін өндірумен айналысады.

Диана – көпбалалы ана. Үлкен қызы ерекше күтімді қажет етеді және Қостанай қаласындағы түзету мектебінде оқиды. Жол шығындары мен оқу қажеттіліктері отбасылық бюджеттің негізгі бөлігін қамтып отыр. Бірақ бұл қиындықтар кәсіп бастауға кедергі емес, керісінше, себеп болды.

«Қол қусырып қарап отырмай, өз кәсібімді бастауым керек деп шештім», – дейді Диана.

Алынған қаражатқа Диана 3 бас ірі қара мал сатып алады: 2 торпақ – өсім алу, табынды ұлғайту мақсатында, 1 сементаль тұқымды сауынды сиыр – сүт бағытында.

Малды таңдау, іздеу – оңай болған жоқ. Өз ісіне мұқият қараған ерлі-зайыпты Нестеровтар тёлкаларды Жітіқара ауданы, Тоқтарово ауылынан, ал сауын сиырды Денисов ауданындағы Антоновка ауылынан сатып алды. Сиыр жуас, қолға тез үйреніп, сүтті жақсы береді. Ал тёлкалар жас болғандықтан әзірге аулада бағылуда. Жерге үйреніп, жуасып алған соң, келесі жылы табынға қосу жоспарланған.

Барлық мал ветеринарлық бақылаудан өтіп, арнайы карантин мерзімінен кейін ғана жайылымға шығарылған. Денсаулығы жақсы, құжаттары түгел.
Қазір Диана бір сиырдан сүт сауып, ауылдастарына табиғи сүт, май, қаймақ, сүзбе сата бастады. Тұрақты тұтынушылары пайда болып, көрші ауылдардан да хабарласатындар бар. Өнімінің табиғилығын көрген жұрт қайта-қайта келіп жатады.

«Көп емес, бірақ алғашқы табыс бар. Бұл мен үшін үлкен жетістік. Таза өнім ұсынып, халықтың алғысын алу – еңбегімнің жемісі», – дейді ол.
Кәсібін «Нестерова» жеке кәсіпкер ретінде тіркеп, барлық салықтық есептерін заңды түрде тапсырып отыр. Қасында кеңес беріп, қолдау көрсетіп жүрген тәжірибелі бухгалтер – Измаил Иставлетов.

Диана бұған дейін бірнеше жұмыс орнында еңбек еткен: 2023 жылы ТОО «Қайрат» мекемесінде, кейінірек ТОО «КАМЫСТЫ» ұйымында су бақылаушы болып істеген. Бірақ үй, бала-шаға, ерекше күтімді қажет ететін баласының жағдайына қарай, ресми жұмыстан шығып, өз ісін бастау жолын таңдаған.

«Ауылда кәсіп жасау – оңай емес. Бірақ мүмкіндік берілсе, әр адам өз орнын таба алады. Мал ұстау – маған бала кезден таныс іс. Тек бастауға серпін керек болды. Сол серпінді мемлекет берді», – дейді кәсіпкер.

Алдағы жоспары – мал санын көбейтіп, өнім түрлерін арттыру. Сүт өңдеу цехын ашуды, сүтті тереңірек өңдеуді, қатық, йогурт, ірімшік шығару ісін қолға алуды да армандайды.

Шұға ҚОҢҚАБАЙ