Главные новости Камыстинского района – Qostanai Media

Олардың арасында жалғызбасы әке де бар

Қамысты ауданында тұрғын үй мәселесін шешуге бағытталған ауқымды жұмыс жүріп жатыр. Алты айдың қорытындысы бойынша ауданда тұрғын үйге мұқтаж ретінде 212 азамат есепте тұр. Олардың баспана мәселесін кезең-кезеңімен шешу үшін биыл 34 тұрғын үй немесе 57 пәтер салу және қайта жаңғырту жоспарланған. Жобалардың жалпы аумағы 3,7 мың шаршы метр, ал құны 1 млрд теңгеден асады.

Облыстық бюджеттен 856 млн теңге бөлініп, 23 екіпәтерлі тұрғын үй салынбақ. Нәтижесінде жалпы аумағы 2 960 шаршы метр болатын 46 пәтер пайдалануға беріледі. Ал жеке инвестициялар есебінен тағы 4 үй немесе 4 пәтер салынып, 7 үй қайта жаңғыртылады. Бұл жобалардың жалпы құны 320 млн теңге, ал тұрғын үй аумағы 740 шаршы метрді құрайды.

«Бұл тәсілдің тағы бір артықшылығы бар. Бір жағынан, жаңа үй салуға кететін шығынды айтарлықтай арттырмай, тұрғын үй ұсынысын көбейтуге мүмкіндік берсе, екінші жағынан, елді мекендерге қажетті мамандарды тартуға жол ашады», – Қамысты ауданының әкімі Ерлан Жаулыбаев.

Аудан тұрғындары үшін қуанышты жаңалықтың бірі – Қамысты ауылында бес отбасының жаңа баспанаға ие болуы. Арнайы жұмыс сапарымен барған облыс әкімі Құмар Ақсақалов жаңа салынған, аумағы 80 шаршы метр болатын жайлы пәтерлердің кілтін қоныс иелеріне табыстады.

Аймақ басшысының айтуынша, соңғы үш жарым жылда Қостанай облысында шамамен 1,8 млн шаршы метр тұрғын үй пайдалануға беріліп, 18 мыңға жуық отбасының тұрғын үй жағдайы жақсарған.

Қамысты ауданында да оң динамика байқалады. Соңғы үш жылда мұнда 120 отбасы баспаналы болған. Қазір мемлекеттік қолдауға мұқтаж азаматтар үшін тағы 36 пәтердің құрылысы жүргізіліп жатыр. Ауданда тұрғын үй құрылысына жеке сектордың қатысуы да артып келеді. 2023 жылдан бері жеке инвестициялар есебінен жалпы құны 840 млн теңге болатын 34 тұрғын үй салынған.

Жаңа пәтер кілтін алғандардың қатарында Светлана Сәлімжанова, Шынар Щипанская, Ерболат Оралбаев, Анжела Эпштейн және Гүлсім Арысбаева бар.

Қоныстанушылар атынан сөз сөйлеген Шынар Щипанская үшін бұл күн ерекше қуанышқа толы болды.

«Шынымды айтсам, мен өте қуаныштымын! Бұрын басымда баспана жоқ еді, міне, бүгін отбасымызбен үлкен, жап-жаңа пәтерге қол жеткізіп отырмыз. Көрсетілген осындай зор қолдау мен қамқорлық үшін Мемлекет басшысына және облыс, аудан басшыларына шексіз алғысымызды білдіреміз», -деді Шынар Щипанская қуанышын жасыра алмай.

Шұға ҚОҢҚАБАЙ,
Суреттерді түсірген – Бердіболат КӨРКЕМБАЕВ