Қамысты селосының 56 жастағы тұрғыны Сергей Миних бірнеше ай бұрын жұмыссыздар қатарында еді.
Бұрынғы еңбек жолын Қамысты аумақтық электр стансасында өткізген ол белгілі себептермен жұмысынан айырылып, қайта жұмыс табу қиынға соққан.
Алайда аудандық мансап орталығының мамандары оған «Күміс жас» жобасына қатысуды ұсынған. Бағдарламаның жолдамасы арқылы Сергей мамыр айында «Жұлдыз» дүкеніне шаруашылық меңгерушісі болып тұрақты жұмысқа орналасты.
«56 жаста жұмыс табу оңай емес. Бұл бағдарлама біз сияқты жастағы азаматтарға үлкен демеу болды. Тұрақты табысым бар, өзімді қайта қажет сезіне бастадым. Осындай қолдау үшін алғысым шексіз», – дейді ол.
Сергей Миних – биыл Қамысты ауданында «Күміс жас» жобасы аясында тұрақты жұмысқа орналасқан 8 адамның бірі. Жобаның негізгі мақсаты – 50 жастан асқан, бірақ зейнетке шықпаған жұмыссыз азаматтарды еңбекке тарту, олардың әлеуметтік тұрақтылығын қамтамасыз ету.
Аудан бойынша еңбекке тартылған азаматтардың ауылдар бойынша бөлінісі мынадай: Қамысты селосынан – 4 адам, Ливанов ауылынан – 2 адам, Жайылма ауылынан – 1 адам, Арқа ауылынан – 1 адам.
Аудандық мансап орталығының маманы Әлия Искакованың айтуынша, бұл жоба – әлеуметтік жағынан ғана емес, экономикалық тұрғыдан да тиімді:
«Жоба еңбекке қабілетті азаматтарға жаңа мүмкіндік береді. Қатысу мерзімі аяқталғаннан кейін жұмыс беруші адамды тұрақты қызметке қалдыруы тиіс. Бұл – зейнеталды жастағы адамдар үшін сенімді қолдау», – дейді ол.
«Күміс жас» жобасы бойынша жұмыс ұзақтығы 36 айдан аспайды. Осы уақыт ішінде жалақының бір бөлігін мемлекет субсидиялайды: 1-жылы – 70% (бірақ 30 АЕК-тен аспайтын), 2-жылы – 65%, 3-жылы – 60%.
Бағдарлама тағы бір қатысушы – Ольга Маляренко үшін де жаңа мүмкіндіктерге жол ашты. Ол «Жантау» дүкеніне сатушы болып жұмысқа тұрды. Өз сөзінде ол жобаның маңыздылығын атап өтіп, алғысын білдірді.
Айта кетейік, бұл жобаға 50 жастан асқан, зейнеткерлікке дейінгі кез келген азамат аудандық мансап орталығына өтініш беру арқылы қатыса алады.
Шұға ҚОҢҚАБАЙ