Главные новости Камыстинского района – Qostanai Media

Қамысты ауданының жас споршылары халықаралық аренада жеңіспен оралды

«Amanov top team MMA» спорт клубының тәрбиеленушілері 31 қазан мен 3 қараша аралығында Түркияның Стамбул қаласында өткен әмбебап жекпе-жек бойынша Әлем чемпионатында сәтті өнер көрсетті.

Жеңімпаздарды 5 қараша күні туған жері Қамыстыда туыстары, достары мен ауылдастары салтанатты түрде қарсы алды. №1 орта мектептің алдында өткен қошемет сәті ерекше әсерлі болды, оқушылар мен ұстаздар тулар ұстап, жеңімпаздарға ыстық ықыластарын білдірді.

«Amanov top team MMA» спорт клубының негізін қалаушы, қолма-қол ұрыстан және грэпплингтен спорт шебері Бекжан Аманов бұл жарыстың маңызын атап өтті.

«Әлемдік деңгейдегі бәсекеге дайындық ұзақ әрі қиын болды. Қазақстанды Қамысты ауданын абыроймен таныстыру үшін бар күшімізді салдық. Чемпионатқа әлемнің 11 елінен спортшылар қатысты. Біздің жігіттер Өзбекстан, Тәжікстан, Грекия және Түркиядан келген қарсыластарын жеңіп шықты», – деді ол.

Қамысты ауданы әкімінің аппараты басшысы Абай Жүсіпов жас спортшыларды құттықтап, олардың жетістігі аудан мақтанышы екенін айтты.

– «Жарайсыңдар, жігіттер! Туған жердің атын биік ұстап, үлкен жеңістерге жете беріңдер», – деді ол.

Жеңімпаздардың ата-аналары да перзенттерінің еңбегін мақтан тұтып, бапкер Бекжан Амановқа алғыс білдірді.

Чемпионат қорытындысы бойынша қамыстылық спортшылар Дархан Әбілғазы мен Әділет Жақсыбай әмбебап жекпе-жектен әлемнің қола жүлдегері атанды. Ал Даниэль Баймурзин екі салмақ дәрежесінде өнер көрсетіп, күміс және қола медальдарды жеңіп алды.

Жас спортшылардың айтуынша, бұл жеңіс – жаңа белестерге бастар жолдың бастауы ғана.

«Алдымызда талай жарыс бар. Біз еліміздің намысын қорғау үшін аянбай тер төге береміз», – дейді олар.

Шұға ҚОҢҚАБАЙ, суреттерді түсірген  Дина НҰҒМАНОВА