Еңбекқорлық пен жауапкершіліктің үлгісі

 Қазақта «Әйел бір қолымен бесікті тербетсе, екінші қолымен әлемді тербетеді» деген ғибратты сөз бар. Бұл сөздің астары қыз-келіншектердің ер-азаматтармен қатар ауқымды істерге араласа алатынын, үлкен нәтижелерге қол жеткізетінін аңғартады.

Қайсар, жан-жақты, алғыр, кәсібіне берілген, білімді де білікті әйелдер біздің ауданымызда да көп. Үй мен түздің тірлігін қатар алып, әрекетінен берекетін тауып, әдеті мен мінезін қалыптастырып, тағдырын жарастырған жанның бірі – Қамысты аумақтық сайлау комиссиясының төрағасы Айымгүл Мақаева.

Кейіпкеріміз 1963 жылы Қамысты ауданында дүниеге келген. Осында мектеп бітіріп, ата-анасының үлгілі тәрбиесінің арқасында жоғары білім алып, 1994 жылы есепке алу кредиттік техникумын тәмамдап, банк саласының маманы атанған. Кейін З.Алдамжар атындағы Қостанай әлеуметтік-техникалық университетінде есеп және аудит мамандығы бойынша білім алды.

Еңбек жолын Камышин тұқым инспекциясында зертханашы, содан кейін осы өңірдегі статистика бөлімінде операторы болып бастады. Он жыл бойы мемлекеттік банкте қызмет еткен ол, кейін 27 жыл бойы әлеуметтік қорғау жүйесінде жұмыс істеді. Бұл салада бастапқыда қарапайым маман ретінде еңбек еткен Айымгүл Мақаева өзінің еңбекқорлығы мен жауапкершілігінің арқасында біртіндеп мемлекеттік мекеменің басшысы атанды. Осы уақыт ішінде ол көптеген адамдардың мәселелерін тыңдап, олардың жағдайларын жақсартуға қолдау көрсетті. Әрбір адаммен кездесіп, оның мәселесіне құлақ асқан кезде, ол тек жұмыс емес, жүрекпен істейтін істердің маңыздылығын түсінді.

Айымгүл Мақаева үшін ең үлкен марапат – ол адамдардың «рақмет» айтып, күлімдеп кетуі. Ол өз жұмысына деген жанашырлықпен қарайды және әрдайым дұрыс шешімдер қабылдауға тырысады. Бұл оның адамгершілігін, ұқыптылығын және кәсібилігін дәлелдейді.

Қазіргі уақытта Айымгүл ханым зейнетте болғанымен, сайлау жүйесіндегі қызметін жалғастыруда. Ол көп жылдан бері сайлау науқандарында белсенді қызмет атқарып келеді, бұл да оның үлкен тәжірибесі мен кәсіби біліктілігін талап етеді. Айымгүл Мақаева әрдайым дамып отыруды, жаңа білімдермен толықтыруды және мемлекетіміздегі жаңалықтардан хабардар болуды басты міндеті деп санайды. Ол облыс жаңалықтарына, әсіресе өзінің ауданындағы іс-шараларға үнемі назар аударып, жаңа идеялар мен бастамаларды қолдауға дайын.

Оның еңбекқорлығы мен жауапкершілігі көп рет басқарушы тарапынан жоғары бағаланып, бірнеше рет алғыс пен мемлекеттік наградалармен марапатталды. Айымгүл ханым өзінің жетістіктерін тек өз еңбегінің арқасында ғана емес, ең бастысы, өз отбасының қолдауы мен көмегі арқасында алғанын айтады. Оның отбасы – оның сенімді тірегі. Жұбайы биыл зейнетке шығады, ал ұлы полиция қызметкері болып жұмыс істеп, Жітіқара ауданында тұрады.

– Жақсы адам, мақтаулы маман болуымыз – ата-анамыздың тәрбиесінің арқасы. Әкем – Ұлы Отан соғысына қатысушы. Соғыстан алған ауыр жарақаттан ерте өмірден өтті. Үйде бес бала едік. Бәрімізде кішкентай едік. Анамыз бәрімізді жеткізді. Бәрін көтеріп, ұлдарын ұяға, қыздарын қияға қондырды. Сексенге жетпей көз жұмды. Қиындық пен қуанышты бірге бөлістік. Бала күнімде анамның қасынан шықпайтынмын. Көмектесіп үнемі қасында жүретінмін. Таңдаған мамандығыма ешқашан өкінген емеспін. Жолдасым өте парасатты жан еді.

Менің алаңсыз еңбек етуіме жағдай жасады. Бәріне түсіністікпен қарайтын, маған сенетін. Екеуміз екі бала тәрбиелеп, өсірдік. Мемлекеттік қызметте жүргенімізбен үйде ана екенімізді ұмытпаймыз. Аулада бау-бақша баптап, гүл өсіргенді ұнатамын. Жайқалған жасыл желектің ортасында отыру бір ғанибет қой. Қоғамға пайдамыз тисін деп қолдан келгенше еңбек етуге тырысамыз, әлде де еңбектене береміз – дейді Айымгүл Қуанышбайқызы өз әңгімесінде.

Айымгүл ханым өзінің денсаулығына ерекше назар аударып, жаяу серуендер жасап, физикалық белсенділікке көңіл бөледі. Бұл оның өмірге деген оң көзқарасын, белсенділігін және өз денсаулығына жауапкершілікпен қарауын көрсетеді.

Қазіргі уақытта ол барлық әйелдер мен аналарды Халықаралық әйелдер күнімен құттықтап, бақыт, денсаулық, сұлулық, гүлдер мен сыйлықтар тілейді. Айымгүл ханым үшін бұл мереке тек бір күнде ғана емес, өмірдің әрбір кезеңінде әйелдерге және аналарға деген назар мен құрметтің белгісі болып табылады. Оның жүрекжарды тілегі — барлық әйелдерге өмірде әрдайым жақсылық, махаббат, отбасылық бейбітшілік және әл-ауқат болсын!

Айымгүл Мақаева өзінің еңбек жолы мен қоғамдық қызметінде адал еңбек пен адамгершіліктің жоғары үлгісін көрсетіп келеді. Оның өмірі мен қызметі көптеген адам үшін шабыт пен үлгі боларлықтай.

Шұға ҚОҢҚАБАЙ