Главные новости Камыстинского района – Qostanai Media

Қамыстыда №1 Қамысты жалпы білім беретін мектебінде ерекше қажеттіліктері бар балаларға білім беру мақсатында инклюзивті қолдау кабинеті ашылды.Кабинетті жабдықтауға 8,5 млн теңге облыстық бюджеттен бөлінді. Ол ерекше қажеттіліктері бар балаларға қажет құралдармен жабдықталған. Бұл ауданда ашылған алғашқы кабинет. Аядай ғана мына бөлмеде ерекше балалар өзін жайлы сезінеді. Сабақ кезінде мазасы болмаса осында асығады. Мамандар да балалардың ортаға тез бейімделіп, қалыптасуы үшін мұндай кабинеттердің көмегі зор екенін айтады.

– Бұл кабинеттің бірден бір пайдасы ерекше балалардың қалыпты ортаға бейімделуіне әсер етеді. Өйткені, мұнда түзету жұмыстары, ұсақ моторикамен жұмыс жасайды, зейінін ашады баланың және дефектологиялық, логопедия және психология жағынан үлкен қолдау көрсетіледі. Балалар өздерін ортада қалыпты сезінеді,- дейді №1 Қамысты жалпы білім беретін мектебінің психологы Айнұр Біржанова.

Ерекше білім беруді қажет ететін балалардың саны жыл сайын артып барады. Қазір Қамысты ауданында 109 бала есепке алынған. Жалпы мектепте білім алып жүрген мүмкіндігі шектеулі балалар енді сабақтан тыс уақытта, қосымша жүктелгенде арнайы инклюзивті кабинетке бара алады. Мұнда логопед, психологтар жұмыс істейді. Енді мүмкіндігі шектеулі балалар өз құрбы-құдастарымен бір партада оқып, түсінбеген, игермеген бағдарламаларын жеке оқи алады.

Ата-аналар да қолдау кабинеттің ашылғанына қуанышты. Сергей Николаевич баласы үшін ешқандай кедергі жоғын айтады.

«Біздің мектепте мұндай кабинеттің ашылғаны жақсы болды. Кабинет қажетті құрал-жабдықтармен жабдқталған. Пайдасы зор», – дейді ата-ана.
№1 Қамысты жалпы білім беретін мектептегі инклюзивті кабинет те ата-аналардың ұсынысымен және Жол картасы шеңберінде және ерекше білім алу қажеттілігі бар оқушыларға инклюзивті білім беру мақсатында қолға алынған. Қазір арнайы кабинетте он шақты бала ниет білдіріп отыр. Мұндағы логопед және психолог мамандар балаға көмек көрсетеді.

Мектеп қабырғасындағы ресурстық кабинет – бұл кез-келген баланың, оның ішінде ерекше білім беру қажеттіліктері бар баланың дамуы үшін кедергісіз, толерантты және достық атмосфера мен жағдай жасауға мүмкіндік беретін бірнеше аймақтан тұратын заманауи кеңістік.
Инклюзивтік білім беруді қолдау кабинетінің мамандары мектепте оқу процесінде оқушыларға психологиялық-педагогикалық, коррекциялық қолдау көрсететін болады.

-Қамысты ауданында ерекше білім беру қажеттіліктері бар балаларды қолдауға бағытталған жүйелі жұмыстар жүргізіліп жатыр. Бұл кабинет аудан бойынша бірінші болып табылады. Және оның мақсаты – қолжетімді әрі баланың дамуы үшін кедергісіз болмақ», – деп атап өтті құттықтау сөзінде Қамысты аудандық білім бөлімінің әдіскері Гүлнар Алдонғарова.

№1 Қамысты жалпы білім беретін мектеп директорының оқу-тәрбие ісінің орынбасары Елена Довгополова кабинеттің осы мектепте ашылуына алғыс білдірді. Оның айтуынша, мектепте 43 инклюзивті бала білім алады. Мұндағы арнайы мамандар әр баламен жеке дайындалады.
Кабинет психологы Айнұр Біржанованың айтуынша, ашылған кабинетте шамамен 10 бала білім алады. Диагноздары – бір баланікі ақыл-ойы кемі, қалғандары психикалық дамуында кешеуілдеу белгісі. Үйде оқитын балалар да кабинетке келіп айналысатын болады.

-Бұрындай жай жабдықталмаған кабинетте өткізетін едік. Әсіресе, ата-аналары қуанып жатыр. Кесте бойынша жұмыс жүргіземіз. Мәселен, 1-2 сынып оқушылары сабақтан кейін келеді, 3-5 сыныптар түстен кейін дайындалды. Кабинетте сабақ өтетін аймақ, заманауи экран, сенсорлық аймақ, батут, барлық қажеттілік бар, – дейді Айнұр Біржанова

Шұға ҚОҢҚАБАЙ
Суреттерді Қамысты аудандық білім бөлімі ұсынды.