Главные новости Камыстинского района – Qostanai Media

Мамандарды ауылда ұстап қалудың басты тетігі – баспана.

Ауылдағы ақ халаттылар мен ақ тақта басындағы ұстаздар тапшылығы – жылдар бойы шешімін таппай келе жатқан түйінді мәселе. Осы орайда Қамысты ауданы мәселенің тамырын дәл басып, жас мамандарды баспанамен қамту арқылы өңірде тұрақтандырудың тиімді жолын тауып отыр.

Бүгінде аудан аумағында 15 алғашқы медициналық-профилактикалық көмек нысаны жұмыс істейді. Жалпы денсаулық сақтау саласында 147 қызметкер еңбек етсе де, кадр жетіспеушілігі жиі сезілетін. Дегенмен, жүйелі жұмыстың арқасында бұл олқылықтың орны біртіндеп толып келеді. Жыл басынан бері өңірге 6 орта медициналық қызметкер келіп, Дружба және Клочков ауылдарындағы маман тапшылығы толығымен жабылды. Жалпы есеппен 7 медицина маманы тартылып, оларға баспана мен қажетті мемлекеттік көмек толық көлемде көрсетілді.

Ал білім беру саласындағы педагог тапшылығын жою үшін жергілікті билік жоғары оқу орындары және колледждермен тығыз байланыс орнатқан. Оқу орнын тәмамдаған жастарға тиісті сағаттар беріліп, әрі тұрғын үймен қамтамасыз етілуде. Мектептердегі мұғалімдердің жетіспейтін орындары өзге мектептерден мамандарды тарту және осындай нақты қолдау шаралары арқылы толықтай жабылып отыр.

Мамандарды ауылда ұстап қалудың ең басты тетігі – баспана екені анық. Қамысты ауданында бұл бағытта ауқымды жұмыс атқарылып, соңғы үш жылдың өзінде 150-ге жуық үй толығымен реконструкциядан өтті. Келген мамандар мен оңтүстік өңірлерден қоныс аударушыларға осы үйлер беріліп жатыр.

Оңтүстіктен солтүстікке көшу үрдісі де назардан тыс қалған жоқ. Әкімдік қоныс аударушылар мен қандастарды қабылдауда ең алдымен мұғалімдер мен дәрігерлерге басымдық береді. Бүгінде көшіп келген 4 отбасының мәселесі толық шешіліп, барлығы ауданда тұрақтап қалды, кері көшіп кеткендер жоқ.

Қазіргі таңда Қамыстыға көшіп келуге ниетті азаматтар бар, алайда басты қиындық, жыл соңына қарай квотаның жетіспеушілігі туындауы мүмкін. Соған қарамастан, мемлекет тарапынан жасалып жатқан жағдайлар мен баспана мәселесінің оң шешілуі өңірге деген қызығушылықты арттырып отыр.

«Біз үшін әрбір маман – алтын салмағымен тең. Ауылдың ертеңі мен дамуы білікті кадрларға тікелей байланысты. Сондықтан келген әрбір жас маманға немесе оңтүстіктен қоныс аударған отбасыға ең алдымен баспана мен тұрақты жұмыс ұсынуды басты назарда ұстаймыз. Соңғы жылдары жүзеге асқан жұмыстардың нәтижесі көріне бастады, жас мамандар келіп жатыр, ең бастысы, ауылда тұрақтап қалуда. Алдағы уақытта да бұл жұмысты бәсеңдетпей, кадр тапшылығын түпкілікті шешуге барын саламыз», – дейді Қамысты ауданының әкімі Ерлан Жаулыбаев.

Шұға ҚОҢҚАБАЙ,
Суреттер аудан әкімдігінен алынды